卷九杂咏长歌
[陈妈妈]
（以下俱曲白间用）
陈家妈妈有人缘。风月场中走子几呵年。
（白）小阿奴奴名头虽然人尽晓得。只弗知我起先个族谱相传。我出身原是湖州个人大细。当初跟随子织女天仙。弗匡道沉埋。得我更个凌替。吃个姐儿扯到身边。淹流到那间个时节。弄得我忒弗新鲜。我先前是红娘子结亲时挂歇个星锦帐。又是绿衣郎登科时穿旧个星蓝衫。到如今再捉我做子被头里个抹布。常搭我风流所在去缠绵。湿时节好像海蜇个风味。干时节像荷叶样个蓝班。皱瞒瞒像厨司公汤碗里个紫菜。腌达达咦像湖广客人盐酱筒里烂丢丢个星鱼干。撞着子新做亲介星顽皮精姐姐。日夜捉我搭来拈弄。遇着子私窠子会搂打个星娘娘。也弗住介累得我腥膻。壮罗多。油碌碌。新出笼馒头能个样物事。在上游了游。到有星滋味。骨梭层。瘦乖乖。霍在肉上个东西在上缴了缴。再惹得我介肢腌。有介骚离离掀格腊个样寡妇。时常捉我栳栳。又有个极妖娆最风趣个样尼姑。尽捉我来牵牵。黑松林底下我弗知看子若干个光景。肚家场当中也吃我游玩得子介千千。玉门关上周回四遭替渠个巡哨。毛将军玉柱上头下头也替渠着根介周旋。双膀弯里我常常在搭风流飘荡。笼须席底下也吃我困得介安闲。个星轻薄后生见面弗得介捉我取笑。我笑渠无我了你湿搭搭得介安眠。独吃湖州亲眷常替我合嘴。巧杀子汤家姐姐替我合得人缘。问我里情哥赠我介只曲子。你侬替我唱搭去宣宣。
（皂罗袍）妈妈从来堪羡。伴佳人才子暮寝朝眠。任他结下好姻缘。遇咱才卸得相思担。色非红紫。香非麝兰。合欢帐里。鸳鸯枕边。论功劳咱是个亲篾片。
（歌）我吃个淹润着人了还子多少风流债。雨散云收做一团。
[门神]
结识私情像门神。恋新弃旧忒忘情。
（白）记得去年大年三十夜。捉我千刷万刷。刷得我心悦诚服。千嘱万嘱。嘱得我一板个正经。我虽然图你个糊口之计。你也敬得我介如神。我只望替你家日活。撑立个门庭。有介一起轻薄后生捉我摸手摸脚。我只是声色弗动。并弗容介个闲神野鬼。上你搭个大门。我为你受子许多个烹风露水。带月披星。看破子几呵个檐头贼智。听得子几呵个壁缝里个风声。你当先见我颜色新鲜亨介喝彩。装扮得花噪加倍介奉承。间贴得筋疲力尽。磨得我头鬓蓬尘。弗上一年个光景。只思量别恋个新人。你看我弗像个士女。我也道是你弗是个善人。就要捻我出去。弗匡你起介一片个毒心。遇着介个残冬腊月。一刻也弗容我留停。你拿个冷水来泼我个身上。我还道是你取笑。拿个筅帚来支我。我也只弗做声。扯破了我个衣裳只是忍耐。扯破子我个面孔方才道是你认真。我吃你刮又刮得介测赖铲又铲得介尽情。屈来。我吃你介场擦刮了去介。你做人忒弗长情。我有介只曲子在里到唱来你听听。
（玉胞肚）君心忒忍。恋新人浑忘旧人。想旧人昔日曾新。料新人未必常新。新人有日变初心。追悔当初弃旧人。
（歌）姐道我个郎呀。间我看你搭大门前个前船就是后船眼。算来只好一年新。
[鞋子]
姐儿生来鞋子能。身上花苗颜色精。吃个搭袜缠个情。郎看见子我。整日在面前引了引。
（白）引了引。引了引。一日里上子我大门。渠见子我迷花笑眼。我听渠说话到也知音。骜我松江尤墩衬里。外盖绸缎簇新。爱我口儿紧括。喜我浅面低跟。又弗比靴头样跷嘴跷脸。又弗像急棚棚个样河豚。也弗论价钱多少。开了银包便称。当时成子交易。对合着袋子了就奔。一走走到半路。我自家肚里踌论。看子后生十分像意。弗知那亨个家门。原来是好人家脚气。弗是个样打弗穿个脚跟。厅堂才是平洋洋个砖地。房里又是光滑滑个地平。我指望搭渠一夫一妇。罗得知先有子四个冤魂。陈桥阿妈见子我一歇上头笃嘴笃脸。荡口娘娘见子我努眼凸睛。西山头姨姨看见子我乡谈弗绝。六葱姐见子我市语连声。一个说我浆丢头个迟货。一个说我还复个弗是真身。一个说我客料比弗得松江个有趣。一个说我一出货到弗得南京轿夫营个绝精。我受子介番批点。气子一个黄昏。且耐过子今夜。看大官人明朝捉我看承。巴得大天白亮。只听得砰砰响介敲门。再是三兄四弟拉我里官人去游春。听听我里个说道要带我同走。慌忙随子渠子起身。到处游山玩景。弗曾离个脚跟。我只道一生之事。罗匡弗大长情。弗管天晴雨落。捉我乱步乱奔。兼之黄昏早晚。丢丢丢丢弄得我溥嘴溥面蹭跟。旧时捉我做出人前卖俏个妆扮。间捉我做个通房拖脚看成。冷清清踏板上好一分无兴。耍来头现在渠搭四个冤魂个眼睛。我吃忍气弗过。唱只曲子来你听听。
（驻云飞）我是绸绢通身。举步生风前后云。里外多帮衬。行动都齐整。喳。只为足下欠真诚。脚斜不正。弄得我头绽跟穿。龌龊无干净。如今个弃旧怜新恼杀人。骂你胡行老脚跟。
（白）郎君听得子个只曲子。床上一个番身。会。你正弗说自家弗是。到骂我弃旧怜新。你当初精精致致。间乌皂泥泾。当初光头滑面。间毛头精形。且没说你多呵弗好。就是你唱个只曲子阿一介难听。你弗学六葱价省事。西山介俭纯。弗学荡口介细腻。陈桥介老成。你既是冤三赖四。还你介个整旧如新。只见明朝叫住子介个镇江皮匠。打子四个栀子两个硬跟。拿我准来渠子。挑子我了行程。一揿揿我在箩头里子。我思量个一出去也无造化做个娘子夫人。跟子皮匠虽是肩挑步担。一夫一妇死也甘心。细皮薄切将就过子日子。只要匾担同心。罗得知个个臭贼囤子里贩卖。原来介出整旧如新。热汤捉我洗洗。也是个道理。冷水没头介一淋。石块能介个楦头。对子我肚里一塞。硬板刷擦得我性命难存。连捶再捶捶得我介要紧。只苦得三尺麻绳。皮匠听得子我说又道是我怨命。倒转了楦头一连七八击打得我消魂。
（歌）奉动姐儿没要自道是脚力大。就是拖脚蒲鞋还腾子左嫁人。
吴语再醮曰左嫁人。左。俗音际。
[镬子]
姐儿生来镬子能。一生口厂也无心。吃个木头能介个家公差配子我。整日教我闷闷昏昏气杀子人。
（白）气杀人。气杀人。也无早起无黄昏。压紧子我。弗放番身。有时拿我动火。热炊炊也再有趣。杀子火。依先教我冷冷清清。大鱼大肉拖来便油脂隔腻介是我周捉。我何曾下口介一星。邋遢丫头个龌龊也倒耐子。馊酸个阿婆辞劳一发难听。过日子你搭多烧子介一把了烧子个饭滞。倒说我馋痨了要吃。前月个做分子烧难为子柴火。咦道是我蛮皮了弗替你搭当心。我里阿公道是费柴费火了略拿个灰钯来动得介一动。你搭合家门一歇上底就彳彳亍亍吓出子我精魂。拿我掇出子门槛。推倒在庭心。拿个热铁铲来超子我介七八个耳光。刮镬钯来打子我十数击背心。钹我搭转来兜嘴介两撞。又弗容我汪气汪声。我便火闸闸子介一昼。就是一杓冷水捉我浑身价一淋。我吃子更介铲刮修削。教我亨存身。我思量整日在厨房下转了个日脚。何曾见个光景。踏尽子灶前灰了那得有个超升。我那间吃气弗过。生子介个肚漏。身体热了又烧破子嘴唇。补药吃来无用。看看性命难存。屈来灶君菩萨。嗄到子介个田地。还弗容我安宁。过子年三十夜。拿到圆炉上当个火盆。咦要我支持拜节个茶汤茶水。咦要我照管个男儿大细个点心。一到子正月半。你搭受子个零碎银子。咦要来我身上煎介个煎饼。你搭自弗小心。吃个白日撞偷子物事。你再去请子个天地。札子个草人。籴子个黄豆。也来打个奴身。打得百践粉碎。折开子我个盖老。卖来别人。换子一个汤罐。倒找子渠银子三分。上子野蛮子个担上。一挑挑出子阊门。
（黄莺儿不然）挑出那阊门。上新桥望北行。冶坊浜里家居近。姓王近村。三代有名。家中大小多得甚。细详论。指望一夫一妇。原来靠此做营生。
（歌）安我来粪箕里一丢丢子我来炉里去。依先入子个火炕门。
[烧香娘娘]
春二三月暖洋洋。姐儿打扮去烧香。
（白）乡下人一味老实。城里人十分介轻狂。屋里精无一塌。硬三蛮极要行。便去央求对门知心妈妈。又央求隔壁着意个娘娘。请你来再无别事。有一句知心话替你商量。我从小许子穹窿山香愿。至今还弗曾去了偿。昨夜头偶然得介一梦。三茆菩萨派我灾殃。间我要还还个心愿。百无一有难行。头上少介两件首饰。身上要介几件衣裳。家公便道娘呀。目下无柴少米。作生意咦介无赚处个孔方。春季屋钱要紧米钱又无赊抵当。烧香虽则是个好事。算来要费介二钱个放光。姐儿听得子个句说话。心火爆出子个太阳。天灾神祸骂子几句。乌龟王八也骂子千万百声。抬儿跳凳只听得霹雳拍拉。碗盏壶瓶流水倾匡。
（猫儿坠）天灾神祸。打你大巴掌。谁许你胡言乱主张。我今立意要烧香。无状。再开言。教你满身青胖。
（白）姐儿凶似老虎。家公奔似山獐。吓倒子对门个妈妈。踏痛子隔壁个娘娘。两人百般介解劝。听我说个衷肠。玉帝也弗离个金殿。闺女也弗出个绣房。官人也是做人家个说话。并无半句派赖个肚肠。
（桂枝香）听奴说诉。非奴之过。只因王八无知。致使我心中发怒。把从前细数。从前细数。与他多年夫妇。几见他撑持门户。尽亏奴。若不去还香愿。非为女丈夫。
（白）姐道娘呀。无奈何。头上嵌珠子天鹅绒云髻。要借介一个。芙蓉锦绫子包头借介一方。兰花头玉簪要借一只。丁香环子借介一双。徐管家娘子有一个金镶玉观音押鬓。陈卖肉新妇有两只摘金桃个凤凰。张大姐有个涂金蝴蝶。李三阿妈借子点翠个螳螂。四个铜钱替我买条红头绳札子个螺蛳。饶星鹿角菜来刷刷个鬓傍。讨一圆香圆肥皂打打身上。拆拽介两根安息香熏熏个衣裳。头上便是介个光景。身上那亨商量。借介件绵绸衫桃红夹袄来衬里。外头个单衫。弗拘荸桃青或是柳黄。花绸连裙洒线披风各要一件。白地青镶靴头鞋对脚膝裤各要一双。再借一付洗白脚带。一发称副子个衣裳。两人听得吃生能介一笑。弗匡你介忒要风光。
（驻云飞）上告娘行。借物虽多尽不妨。感你多情况。教我难推让。喳。首饰共衣裳。管教停当。事事俱完。免挂心儿上。明日安心去进香。
（白）姐儿道个样也算来是个小事。我先脱个小衣裳洗洗浆浆。打发两人转背。就央个姑妈外甥。收捉铜杓注子两件。同两领补打个衣裳。替我拿来典当里去当当。买停当子纸马牙香。蜡烛要介两对。还要介一块千张。籴子三升白米。明朝煮饭。一箍松箍今夜烧子个浴汤。兑介钱半八成银子。还个船轿。换介三十新铸铜钱。我打发个叫化个婆娘。色样一齐完备。明朝打点早行。
（懒画眉）娇娘早起拂装台。炭画蛾眉粉弹腮。只愁装不就好身材。尽情把衣饰来穿戴。且喜得人家肯借来。
（白）梳妆打扮完备。摇摇摆摆下子船舱。船家嘴里也再弗说。肚里千思百量。若能替渠歇介一夜。再贴渠介五钱个放光。
（皂罗袍）好个风流气象。看不肥不瘦。不短不长。端端正正坐船舱。时兴衣服乔装扮。粉香脂气。分明是麝兰。娇音细语。分明是凤凰。只听得唤一声家长。使我魂飘荡。
（白）船一摇摇到木渎。轿夫斗夺来抢。姐道众人也弗要罗皂。听我说介个主张。轿钱不你一钱银子。依我处处要行。先到穹窿山还子香愿。后到玄墓山看看假山经堂。转来要到天池看看石殿。再到一云徐家坟上张张。还要看金山寺里坐关个和尚。天平山看持范文正公个祠堂。前头老实个轿夫道我也无个样气力。后头闪出两个轩气腊个后生。便道轿钱也弗敢多要。路上便要吃介两遭个酒浆。等我抬你满山兜。便奉承你星气力。你也弗要慌忙。姐儿坐子轿子装模做样。引动了多少个后生。有个道是出乡个观音菩萨。有个道是抄化个陈州娘娘。
（香柳娘）这抬来女娘。这抬来女娘。身材停当。乡村那得神仙降。怎禁他这巧妆。怎当他这俏妆。只少个小红娘。莺莺无两样。看蜂喧蝶嚷。看蜂喧蝶嚷。到处生香。令人妄想。
（白）看看日头落子。姐儿肚里又介心慌。夜晚头边有星走失。借别人介多呵物事。教我拿奢赔偿。慌忙赶到屋里。撞着子多呵个婶娘。说弗尽路上个景致。话弗了山上个风光。只听得大门呀生能介一响。再是讨衣裳个阿妈娘娘。慌忙头上除下子首饰。身上卸落子衣裳。两人抬头一看。满身剥得精光。
（歌）方才金光参殿。像个常熟山上新装塑个尊观音佛。间破珠撒。好像个盘门路里别脚乌龟算命个星臭婆娘。
[破帽歌]
有介一只山歌唱你侬听。新翻腾打扮弄聪明。
（白）也弗唱蒲鞋毡袜。也弗唱直掇海青。也弗唱绢裙绫裤。也弗唱香袋汗巾。单题唱个头上帽子。历代几样翻新。旧时作尖顶长号。后来改子平顶鼓墩。咦有缨子朗锁密结瓦棱。惟有小张官人头上帽子戴又戴得个停当。盔又盔得介娉婷。光油油露出子杭州丫髻。亮晃晃插起重庆金簪。后头掂出子双螭虎圈子。前头推起子九针子网巾。帽子带得介长远。年深月久成精。忽朝一日头上说话。
叫声小张官人。我一跟跟你两三巡黄册。你一戴戴我二三十个清明。春秋四季并弗曾盔顶丝罗帽。寒腊月并弗曾盔顶帽毡巾。总成你相交子多少姹童窠子。陪伴子若干监生举人。看子多少提偶扮戏游湖踏青。唱船里人中显贵。酒楼上闹里夺尊。捉个猪胆去油。教我受子多少腌苦恼。捉个百药箭上色。教我吃子多少鸟皂泥筋。板刷常常相会。引线弗曾离身。一日子修理得介停当。戴出子阊门。月城里遇着子朋友说话。聚集子东西来往无数个闲人。看呆子山东贩夸子。立痴子江西贩帽子个客人。江西老乡谈弗绝。苏州歇后语连声。十字街蟒龙玉乌纱冠石皮得介测癞。老弗识波罗生荔枝圆重夕得介忒村。日头照子好像走差次身头上草帽。雨落湿子好像压匾介一个老人头巾。捻来手里好像紧介一支偷瓜蝎。落来地上好像矗起来介一支刺毛莺。修帽见子一吓。洗网巾吃子一惊。破靴羊毛换铜钱缉三问四。卖花换眢豆弗曾离门。小张听得几句言语。吓得冷汗直淋。立来无人烟所在。探下来看介一看。真当弗像。只得去贴旧换新。欲要黄帽铺里去讲讲。咦弗好戴子进渠大门。思量无些摆布。只得借子一顶麻布头巾。皱漫漫好像看坟个董永。软搭搭好像丁忧个洞宾。遇着子承天寺里个和尚。定道请渠领丧。入木。撞见了玄妙观里道士。定道请渠退煞。念经。乡邻赶趁子分子。朋友怕阙子人情。小张道个是我里宗兄便服。弗消得列位介费心。无些意思介一日。只得走转家门。家婆道你出去子介一日。阿会干子帽子个正经。咳。家婆。弗要话起。走肿子个脚底。擢痛子个背心。饿过子个肚里，看花子个眼睛。帽铺家家走到。价钱个个弗等。只得反渠转来假充一个朗锁戴戴。到下桥行市再寻。弹忒子龌龊。吹忒子个灰尘上子盔头盔介一盔。屈刚盔子三五六星。小张捶胸跌脚。说道弗匡你介一个收成。家婆道你也弗要大惊小怪。还干若干正经。大块头儿改双凉鞋。斜块头儿，改子外公头上束发包巾。帽沿拿来做个扎额。我里夏天恍恍。碎块头儿做子一顶细密网巾。头脑做个刷牙来刷刷。零零碎碎做个香袋熏熏。帽子道我前世作尽子奢孽。你公婆两个摆布得我介尽情。小张道。宗兄大哥。帽子大人。你侬弗要出言吐气。我侬唱介一支曲子你听听。
（驻云飞）帽样新鲜不复完。今剩缺连。一向承装观。今日堪埋怨。喳。戴你不多年。帽子道尽勾你哉。如何稀烂。想是当初。修旧将咱骗。为你冤家费我钱。
（白）帽子道鼓弗打弗响。钟弗撞弗鸣。别人戴子风里坐。你戴子我雪里奔。凭你改长改短。我也无怒无嗔。捉我改子外公头上束发包巾。我也感承你顶戴。捉我改子你家婆头上扎额。我也当得奉承。
（歌）捉我改子刷牙正要擢你臭贼个张嘴。捉我改子凉鞋正要打碎你个老脚跟。
游翰琐言尚有破毡袜歌。无味。故不录。
[山人]
说山人。话山人。说着山人笑杀人。
（白）身穿着僧弗僧俗弗俗个沿落广袖。头带子方弗方圆弗圆个进士唐巾。弗肯闭门家里坐。肆多金在土地堂里去安身。土地菩萨看见子。连忙起身便来迎。土地道呸。出来。我只道是同僚下降。原来到是你个些光斯欣。咦弗不知是女职武职。咦弗知是监生举人。咦弗知是粮长升级。咦弗知是讼书老人。咦弗来里作揖画卯。咦弗来里放告投文。耍了闹哄哄介挨肩了擦背。急逗逗介作揖了平身。轿夫个个侪做子朋友。皂隶个个侪扳子至亲。带累我土地也弗得安静。无早无晚介打户敲门。我弗知你为奢个事干。仔细替我说个原因。山人上前齐齐作揖。告诉我里的亲亲个土地尊神。我哩个些人。道假咦弗假。道真咦弗真。做诗咦弗会嘲风弄月。写字咦弗会带草连真。只因为生意淡薄。无奈何进子法门。做买卖咦吃个本钱缺少。要教书咦契个学堂难寻。要算命咦弗晓得个五行生克。要行医咦弗明白个六脉浮沉。天生子软冻冻介一个担轻弗得步重弗得个肩膊。又生个有劳劳介一张说人话人自害自身个嘴唇。算尽子个三十六策。只得投靠子个有名目个山人。陪子多少个蹲身小坐。吃子我哩几呵煮酒馄饨。方才通得一个名姓。领我见得个大大人。虽然弗指望扬名四海。且乐得荣耀一身。吓落子几呵亲眷。耸动子多少乡邻。因此上也要参参见佛。弗是我哩无事入公门。土地听得个班说话。就连声骂道个些说个猢狲。你也忒杀胆大。你也忒杀恶心。廉职咦介扫地。钻刺咦介通神。我见你一掏出。袖子里常有手本。一个上一个落。口里常说个人情。也有时节诈别人酒食。也有时节骗子白金。硬子嘴了了说道恤孤了仗义。曲子肚肠了说道表兄了舍亲。做子几呵腰头低擦。难道只要闹热个门庭。你个样瞒心昧己。那瞒得皂界六神。若还弗信。待我唱支驻云飞来你听听。
（驻云飞）笑杀山人。终日忙忙着处跟。头戴无些正。全靠虚帮视。茶。口里滴溜清。心肠墨锭。八句歪诗。尝搭公文进。今日胥门接某大人。明日阊门送某大人。
（白）山人听子。冷汗淋身。便道土地。忒杀显灵，大家向前讨介一卦。看道阿能勾到底太平。先前得子一个圣笤。以后再打子两个翻身。土地说道在前还有青龙上卦。去后只怕白虎缠身。你也弗消求神请佛。你也弗消得去告斗详星。也弗消得念三官宝诰。也弗消得念救苦真经。
（歌）我只劝你得放手时须放手。得饶人处且饶人。
此歌为讥诮山人管闲事而作。故末有放手饶人之句。或云张伯起先生作。非也。盖旧有此歌。而伯起复润色这耳。
[鱼船妇打生人相骂]
网船上婆娘童子打生个人，一场相骂闹淫淫，你一声来我一白，也弗输来也弗赢，（白）也弗赢，忒好听，只见个个婆娘参起来叫四邻，便骂道你个丢丢响个乌蝇弗要走子去，也搭你搂一个六江水也浑，论起行户中间来我搭你芦上芦下，称起骨头来称八两我半斤，看得别人便是头娘娘能介一点，自家便癞虼巴并进子天平，别人道是善善善，倒是鳅篮里拣出来个一张嘴，呵呵呵再是个旱渴精，突出子个双田螺头个眼睛，久惯要是介了甲戟诈。开子张鲇鱼剌达嘴，只要吃别人星，没得又弗吃你一网兜子，终弗然撑开子船头弗成，得知老娘是个突鲫个相骂嘴，阿呀呀，气得我个肚皮再像子清明前个河豚，我弗像你搭吊带皮个妹子能介弗收管个两脚蚌，也弗像你当黄尝嘴家婆能介{鼻邕}臭鳝能，当面前吃别人骂绝子个团鱼鳖背，背後吃别人挖尽子螺蛳窟臀，你个样正叫子田鸡乾，骨里臭，也要伸出子乌gui头做耍人，打生个气得肚膨气胀，便骂道你个个鹆录鸱个讨人，一张嘴尝是鸦飞鹊乱，久惯是牛皮乌斤，面皮便野鸡斑起，白票手个双眼睛，连番要做个火老鸦，人人叫你是个白鹞鹰屎你也弗曾经我介一弹，弗怕你飞上了青云，等我送得你鹊庭直出，眼见得你搭家公寒章鸡能，我弗怕你搭一窠罗个十姊妹，也弗怕你搭鹞鹰头鹘子眼个星小贼精，你再怪鸟能介捉人冲撞，笑你斑鸠教鹁鸪弗看自个绒形，凭你连夜磨尖子鸭嘴，里思量天鹅肉来吃星，别人家个婆娘穷做穷乾啾啾缩在窠里，并弗会饣舌臀鸟能介着处奔奔，又弗是你撒食养来搭个，冉阝了要你鸟说胚介撒村，等我夹子个张毛鹁鸪看介，你个档雌鸡啼只做个人家弗成，两个相骂子介一画，聚集子两边两岸无数个闲人，指头大个碎囝儿尽夹箝蟹夹，好像野鸭阵飞子介一村，有介一个白头老者喝住子两人，说道弗跳水弗动，见子冤便放个鹰，李家个阿姊你个样参鱼头性格里去使，张家第三个你个个痴鹅头式煞认真，各有道路，各有做人，尽弗消得老鹤跌倒，只捉嘴来撑，冉阝了是介水面上使铁搭摊浪得介尽情，四边田里野鸭落，你也弗去支网，东边港里鱼扶头，你也弗去赶青，又弗是争田夺地，天呀，只问你相骂有耍好听，依我劝开子罢，能我老人家是一派正经，（歌）并弗是羹碗里鱼头拨拨转，支花野味赵谈春。
昔年有赵谈春者，善诙谐，吴语谓没正经日赵，因日赵谈春云。