第二十四回 只怕招冤同行相护 自甘落魄失路谁悲
按：王莲生躺在榻床右首吸烟过瘾，复调过左首来吸上三口，渐觉眉低眼合，像是烟迷。张蕙贞装好一口烟，将枪头凑到嘴边，替莲生把火，莲生摇手不吸。蕙贞轻轻放下烟枪，要坐起来。莲生一手扳住蕙贞胸脯，说：“耐也吃一筒 。”蕙贞道：“我覅吃；吃上仔瘾，阿好做生意嗄。”莲生道：“陆里会上。小红一径吃，勿曾有瘾。”蕙贞道：“小红自然；俚是本事好，生意会做，就吃上仔也勿要紧。倪要像仔俚也好哉。”莲生道：“耐说小红会做生意，为啥客人也无拨哉嗄？”蕙贞道：“耐怎晓得俚无拨客人？”莲生道：“我看见俚前节堂簿，除脱仔我就不过几户老客人叫仔二三十个局。”蕙贞道：“做仔耐一户客人，再有二三十个局，也就好哉啘。”莲生道：“耐勿晓得；小红也勿过去，俚开消大，爷娘兄弟有好几个人来浪，才靠俚一干仔做生意。”蕙贞道：“爷娘兄弟来里小房子里，陆里有几花开消？常恐俚自家个用场忒大仔点。”莲生道：“俚自家倒无啥用场，就不过三日两头去坐坐马车。”蕙贞道：“坐马车也有限得势。”莲生道：“价末啥个用场嗄？”蕙贞道：“倪怎晓得俚。”
莲生便不再问，自取烟盘内所剩两枚烟泡，且烧且吸，移时始尽；于是一手扶住榻床栏杆，抬身坐起。蕙贞知道是要吸水烟，忙也起身，取一支水烟筒，就在榻床边挨着莲生肩膀偎倚而坐，装水烟与莲生吸。
莲生吸了两筒，复问道：“耐说小红自家用场大，是啥个用场耐说说看 。”蕙贞略怔一怔道：“倪是说说罢哉呀，小红自家末再有啥个用场，耐覅到小红搭去瞎说瞎话。倘然耐说仔啥末，俚只道倪说仔俚邱话，再拨俚骂。”莲生笑道：“耐说末哉，我阿去告诉小红！”蕙贞大声道：“教我说啥物事嗄？耐搭小红三四年老相好，再有啥勿晓得，倒来问倪。”莲生笑而叹道：“耐末真真是谄头！小红说仔耐几花邱话，耐勿说俚倒罢哉，再要替俚包瞒。”蕙贞也叹道：“勿是包瞒呀，耐末也缠煞哉！小红有仔爷娘兄弟，再要坐坐马车，阿是用场比仔倪大点。”
莲生冷笑丢开。水烟吸罢，蕙贞仍并坐相陪，和莲生美满恩情，温存浃洽，消磨了好一会，敲过十二点钟，唤娘姨收拾安睡。
蕙贞在枕上又劝莲生道：“小红个人，凶末凶煞，搭耐是总算无啥。俚故歇客人末也赛过无拨，就不过耐一个人去搭俚绷绷场面，俚勿搭耐要好，再搭啥人要好？前转明园俚要同耐拚命，倒勿是为别样，常恐耐做仔我，俚搭勿去哉。耐勿去仔，俚阿是要发极嗄？我倒劝耐，耐搭俚相好仔三四年，也该应摸着点俚脾气个哉，稍微有点勿快活，耐哝得过就哝哝罢。俚有辰光就推扳仔点，耐也覅去说俚。耐说仔俚，俚勿好来怪耐，倒说是倪教耐个闲话，倪末结仔俚几花冤家。单是背后骂倪两声倒也罢哉，倘忙台面浪碰着仔，俚末倒覅面孔，搭倪相骂，倪阿要难为情？”莲生道：“耐说俚搭我要好，陆里会要好嗄？我坎做俚辰光，俚搭我说：‘做倌人也难得势，就不过无拨好客人；故歇有仔耐，故是再好也勿有。难再要去做一户蓦生客人，定归勿做个哉。’我说：‘耐勿做末，就嫁拨我好哉。’俚嘴里末也说是‘蛮好’，一径搭浆下去。起初说要还清仔债末嫁哉，故歇还仔债，再说是爷娘勿许去。看俚光景，总归勿肯嫁人，也勿晓得俚终究是啥意思。”
蕙贞道：“故倒也无啥别样意思。俚做惯仔倌人，到人家去规矩勿来，勿肯嫁。再歇两年，年纪大仔点，难末要嫁耐哉。”莲生摇手道：“倘然沈小红要嫁拨我，我也讨勿起。前两年三节开消差勿多二千光景；今年加二勿对哉，还债买物事同局帐，一节勿曾到，用拨俚二千多。耐想，我陆里有几花洋钱去用？”蕙贞复叹道：“像倪，一年就一千洋钱也好哉。”莲生再要说时，只听得当中间内阿巧睡梦中咳嗽声音，遂被叉断不提。
次日上午，王莲生、张蕙贞初起身，管家来安即来禀说：“沈小红搭娘姨请老爷过去说句闲话。”蕙贞忙问甚事，莲生道：“陆里有啥闲话，两日勿去仔末，生来要来请哉啘。”蕙贞寻思一会道：“我猜小红定归有点闲话要搭耐说。耐想 ？随便啥辰光，耐一到仔该搭来，俚哚就晓得哉。故歇是晓得耐来里该搭，来请耐，就无啥闲话也要想句把出来说说，噪得耐勿舒齐。耐说阿对？”
莲生不答。比及用毕午餐，吸足烟瘾，莲生方思过去。蕙贞连连叮嘱道：“耐到沈小红搭去，小红问耐陆里来，耐就说是来里该搭好哉。俚要搭耐说啥闲话，勿要紧个末依仔俚一半；耐就勿依俚，也覅搭俚强，好好交搭俚说。小红个人不过性子粳点，耐说明白仔，俚也无啥。耐记好仔，覅忘记。”
莲生答应下楼，并不坐轿，带了来安出门，只见一个小孩子往南飞跑，仿佛是阿珠的儿子，想欲声唤，已是不及。莲生却往北出东合兴里，由横弄穿至西荟芳里。阿珠早迎出门首，相随上楼，同到房里。沈小红当窗闲坐，手中执着一对翡翠双莲蓬在那里玩弄；见了莲生，也不起身，只冷笑道：“倪该搭勿请耐是想勿着个哉！两日天有几花公事，忙得来一埭也勿来。”莲生佯笑坐下，阿珠接着笑道：“王老爷一请仔倒就来，还算倪有面孔，勿曾坍台。先生，耐要谢谢我个 。”说着，先绞把手巾，忙将茶碗放在烟盘里，点起烟灯，说：“王老爷请用烟。”
莲生过去躺在榻床上手，吸起烟来。小红便道：“耐到该搭来，苦煞个 ！才是笨手笨脚，无啥人来搭耐装烟。”莲生笑道：“啥人要耐装烟嗄？”当时阿珠抽空回避。
莲生本已过瘾，只略吸一口，即坐起来吸水烟。小红乃将翡翠双莲蓬给莲生看。莲生问：“阿是卖珠宝个拿得来看？”小红道：“是呀；我买哉，十六块洋钱，比仔茶会浪阿贵点？”莲生道：“耐有几对莲蓬来浪，也好哉，再去买得来做啥？”小红道：“耐搭别人末去买仔，挨着我末就勿该应买哉？”莲生道：“勿是说勿该应买；耐莲蓬用勿着末，买别样物事好哉。”小红道：“别样物事再买哉啘。莲蓬用末用勿着，我为仔气勿过，定归要买俚一对，多豁脱耐十六块洋钱。”莲生道：“价末耐拿十六块洋钱去，随便耐买啥。该个一对莲蓬也无啥好，覅买哉，阿对？”小红道：“倪是人也无啥好，陆里有好物事拨倪买。”莲生低声做势道：“阿唷！先生客气得来，啥人勿晓得上海滩浪沈小红先生，再要说勿好！”小红道：“倪末阿算得是先生嗄？比仔野鸡也勿如啘，惶恐哉 ，叫先生！”
莲生料想说不过，不敢多言，仍嘿然躺下，一面取签子烧烟，一面偷眼去看小红。见小红垂头哆口，斜倚窗栏，手中还执那一对翡翠双莲蓬，将指甲掐着细细分数莲子颗粒。莲生大有不忍之心，只是无从解劝。
适值外场报说：“王老爷朋友来。”莲生迎见，乃是洪善卿，进房即说道：“我先到东合兴里去寻耐，说去哉；我就晓得来里该搭。”
小红敬上瓜子，笑向善卿道：“洪老爷，耐寻朋友倒会寻哚，王老爷刚刚到该搭来，也拨耐寻着哉！该搭王老爷难得来个啘，一径来里东合兴里。今朝为仔倪请仔了，坎坎来一埭。晚歇原到东合兴去。洪老爷，耐下转要寻王老爷末，到东合兴去寻好哉。东合兴勿来浪，倒说勿定来里啥场花。耐就等来浪东合兴，王老爷完结仔事体转去末，碰头哉啘。东合兴赛过是王老爷个公馆。”
自甘落魄失路谁悲
小红正在唠叨，善卿呵呵一笑，剪住道：“覅说哉！我来一埭听耐说一埭，我听仔也厌气煞哉。”小红道：“洪老爷说得勿差，倪是生来勿会说闲话，说出来就惹人气。像人家会说会笑，阿要巴结。一样打茶会，客人喜欢到俚哚去，同得去个朋友讲讲说说，也闹热点。到仔该搭，听仔倪讨气闲话，才勿对哉，再要得罪朋友。耐说王老爷陆里想得着到该搭来嗄！”
善卿正色道：“小红覅实概，王老爷做末做仔个张蕙贞，搭耐原蛮要好，耐也就哝哝罢。耐定归要王老爷勿去做张蕙贞，在王老爷也无啥，听仔耐闲话就勿去哉。不过我来里说，张蕙贞也苦煞来浪，让王老爷去照应点俚，耐也赛过做好事。”这几句倒说得沈小红盛气都平，无言可答。
于是洪善卿、王莲生谈些别事。已近黄昏，善卿将欲告辞，莲生阻止了，却去沈小红耳边悄悄说了几句，听不出说的甚么。只见小红道：“耐去末哉啘，啥人拉牢耐嗄？”莲生又说两句，小红道：“来勿来随耐个便。”莲生乃与善卿相让同行。
小红略送两步，咕噜道：“张蕙贞等来浪，定归要去一埭末舒齐。”莲生笑道：“张蕙贞搭勿去。”说着，下楼出门。善卿问：“到陆里？”莲生道：“到耐相好搭去。”
两人往北，由同安里穿至公阳里周双珠家。巧囡为王莲生叫过周双玉的局，引莲生至双玉房里。洪善卿也跟进去，见周双玉睡在床上。善卿踅到床前，问双玉：“阿是勿适意？”双玉手拍床沿，笑说：“洪老爷请坐 ，对勿住。”
善卿即坐在床前，与双玉讲话。周双珠从对过房里过来，与王莲生寒暄两句，因请莲生吸鸦片烟。巧囡却装水烟与善卿吸。善卿见是银水烟筒，又见妆台上一连排着五只水烟筒，都是银的，不禁诧异道：“双玉个银水烟筒有几花嗄？”双珠笑道：“故末也是倪无娒拍双玉个马屁哉 。”
双玉听见，嗔道：“阿姐末总瞎说！无娒拍倪个马屁，阿要笑话。”善卿笑问其故，双珠道：“就是前转为仔银水烟筒，双玉教客人去买仔一只，难末无娒拿大阿姐、二阿姐个几只银水烟筒才拨仔双玉，双宝末一只也无拨。”善卿道：“价末故歇再有啥勿适意？”双玉接说道：“发寒热呀。前日夜头客人碰和，一夜勿曾困，发仔个寒热。”
说话之时，王莲生烧成一口鸦片烟要吸，不料烟枪不通，斗门咽住。双珠先见，即道：“对过去吃罢，有只老枪来浪。”
当下众人翻过对过双珠房间，善卿始与莲生说知，翡翠头面先买几色，价值若干，已面交与张蕙贞了。莲生亦问善卿道：“有人说沈小红自家个用场大，耐阿晓得俚啥个用场？”善卿沈吟半晌，答道：“沈小红也无啥用场；就为仔坐马车，用场大点。”莲生听说是坐马车，并不在意。
谈至上灯时候，莲生要赴沈小红之约，匆匆告别。善卿即在双珠房里便饭。往常善卿便饭，因是熟客，并不添菜，和双珠、双玉共桌而食；这晚双玉不来，善卿说道：“双玉为啥三日两头勿适意？”双珠道：“耐听俚呀，陆里有啥寒热。才为仔无娒忒欢喜仔了，俚装个病。”善卿问：“为啥装病？”双珠道：“前日夜头双玉起初无拨局，刚刚我搭双宝出局去末，接连有四张票头来叫双玉。相帮、轿子才勿来浪，连忙去喊双宝转来。碰着双宝台面浪要转个局，教相帮先拿轿子抬双玉去出局，再去抬双宝。等到双宝转来仔，再到双玉搭去末，晚哉。转到第四个局，台面也散哉，客人也去哉，双玉转来，告诉仔无娒，生来同双宝勿对，就说是双宝耽搁仔了，要无娒去骂俚两声。无娒为仔台面浪转局客人来里双宝房里，勿曾说啥。难末双玉勿舒齐哉，到仔房里，乒乒乓乓掼家生。再碰着客人来碰和，一夜勿曾困，到明朝就说是勿适意。”
善卿道：“双宝苦恼子，碰着仔前世个冤家。”双珠道：“先起头无娒勿欢喜双宝，为仔俚勿会做生意，说两声；双玉进来到故歇，双宝打仔几转哉，才为仔双玉。”善卿道：“故歇双玉搭耐阿要好？”双珠道：“双玉要好末要好，见仔我倒有点怕个。无娒随便啥总依俚，我勿管俚生意好勿好，看勿过定归要说个，让俚去怪末哉。”善卿道：“耐说俚也勿要紧，俚阿敢怪耐。”
须臾，用过晚饭，善卿无事即欲回店。双珠也不甚留。洪善卿乃从周双珠家出来，踅出公阳里南口，向东步行，忽听得背后有人叫声“娘舅”。
善卿回头一看，正是外甥赵朴斋，只着一件稀破的二蓝洋布短袄，下身倒还是湖色熟罗套裤，靸着一双京式镶鞋，已戳出半只脚指。善卿吃了一惊，急问道：“耐为啥长衫也勿着嗄？”赵朴斋嗫嚅多时，才说：“仁济医馆出来，客栈里耽搁仔两日，缺仔几百房饭钱，铺盖衣裳才拨俚哚押来浪。”善卿道：“价末为啥勿转去嗄？”朴斋道：“原想要转去，无拨铜钱。娘舅阿好借块洋钱拨我去趁航船？”被善卿啐了一口，道：“耐个人再有面孔来见我！耐到上海来坍我个台，耐再要叫我娘舅末，拨两记耳光耐吃！”
善卿说了，转身便走。朴斋紧跟在后，苦苦求告。约走一箭多远，善卿心想无可如何，到底有碍体面，只得喝道：“同我到客栈里去！”朴斋诺诺连声，趋前引路，却不往悦来栈，直引至六马路一家小客栈，指道：“就来里该搭。”
善卿忍气进门，向柜台上查问。那掌柜的笑道：“陆里有铺盖嗄，就不过一件长衫，脱下来押仔四百个铜钱。”
善卿转问朴斋，朴斋垂头无语。善卿复狠狠的啐了一口，向身边取出小洋钱赎还长衫，再给一夜房钱，令小客栈暂留一宿，喝叫朴斋：“明朝到我行里来！”朴斋答应，送出善卿。善卿毫不理会，叫把东洋车自回南市咸瓜街永昌参店，短叹长吁，没法处置。
次早，朴斋果然穿着长衫来了。善卿叫个出店领朴斋去趁航船，只给三百铜钱与朴斋路上买点心。赵朴斋跟着出店辞别洪善卿而去。
第二十四回终。